Giulietta e Romeo son Furlans

Sêso inemorâts, provaiso un sintiment grandon tant che chel di Juliete e Romeu, i morôs plui innomenâts dal mont? Alore, sierait un lamp i voi e, petât un salt indaûr tal timp di cualchi secul, imagjinait il moment che chei doi zovins si son viodûts, plasûts e cjolts par simpri: il lôr prin, magjic incuintri. Ma no mo, no a Verone dal 1303… a Udin dal 1511! Po sì sì, la storie di Romeu e Juliete – che l’estri poetic di William Shakespeare al à vût tramudât intune rapresentazion universâl dal amôr – e je nassude culì in Friûl. Romeu e Juliete a son in realtât Luîs Da Porto e Luziute Savorgnan, il prin nassût a Vicence, dal 1485, di Bernardin Da Porto e Lisabete Savorgnan Del Torre, la seconde nassude a Breçà, dongje Udin, dal 1496, fie di Jacum Savorgnan Del Monte e Marie Griffoni.<br />
Lis fameis, ostacul, par vie dai lôr cavîi incancrenîts di agnorums, al amôr dai doi zovins, a son duncje chês dai Savorgnans, i siorons furlans di chê volte. Luîs e Luziute, fîs di cusins, si cognossin di piçui, ma al è ai 26 di fevrâr dal 1511 che i lôr cûrs si impiin di passion. E je la vilie di chê Zobie grasse ricuardade inmò vuê sicu la rivoluzion plui tragjiche mai sucedude di chestis bandis, un fiscofero tra i doi brancs dai Savorgnans, cun par sfont la rivalitât tra strumîrs, i nobii furlans filoimperiâi, e çambarlans – contadins, borghês e gnove nobiltât – sostenidôrs chescj achì di Vignesie. Regjist di dute la facende al è Antoni Savorgnan Del Torre, barbe di Luîs Da Porto, seneôs di dâ une lezion ai filo-imperiâi e pandi ae Serenissime la sô fedeltât.
Duncje, intant che a Udin al è par sucedi il finimont, la sere dai 26 di fevrâr, intune atmosfere di incussiente ligrie, si davuelç la fieste di Carnevâl che Marie Griffoni e inmanee intal so palaç; sô fie Luziute di cuindis agns e incjante ducj ju invidâts balant e cjantant. Luîs, ae fieste salacor di scuindon, inceât di cetante grazie e bielece, si inemore pierdût di chel sestin di fantate. Cjapitani sul imprin di une guarnigjon militâr a Cividât, trasferît po dopo a Gardiscje, di li a cualchi mês, intant di une bataie cui imperiâi, une feride intal cuel lu lassarà pidimentât par simpri. I aveniments di chei agns a corin vie di buride, incrosantsi cu lis vicendis e i sintiments personâi. A Vignesie al tache a no plasêi plui cuissà ce cemût che Antoni Savorgnan al sparone in Friûl, si che i gjave vie la fiducie; par dute rispueste chel al volte gabane e al va cui imperiâi. Lât a platâsi in Carinzie, in curt sicaris de Serenissime lu cjatin fûr e lu netin. Jaroni Savorgnan Del Monte, so cusin e opositôr, ma ancje barbe e tutôr di Luziute al vuadagne, parie cun dute la robe di Antoni, la fiducie dai venezians interessâts, dut câs, ae pâs tra lis dôs fameis, tant di sburtâ par un matrimoni che al justi i contrascj une volte par dutis. Si che, dal 1517 si celebrin lis gnocis di Luziute Savorgnan Del Monte cun Francesc Savorgnan Del Torre, nevôt di Antoni.
E Luîs, biât? Invalit, bessôl e avilidon, salacor propit par rivâ adore di gloti il grop che al à intal cûr, al decît di contâ la storie dal so disfortunât amôr: e nas cussì la novele Giulietta; cu la finzion leterarie, intun studiât ecuilibri tra realtât e fantasie, ve che Luîs, Luziute e la tribulade Udin dal Cinccent a deventin tal ordin Romeu Montecchi, Juliete Capuleti e la Verone dal Tresinte. Cu la fin pardabon tragjiche de conte Da Porto al sbroche fûr la sô muart spirituâl: Romeu-Luîs e Juliete-Luziute di fat, separâts te vite, a decidin di murî dongjelaltris cun chê di stâ insieme pe eternitât. La storie scalognade di doi zovins inemorâts furlans, cussì come butade jù di un dai protagoniscj, traviers passaçs storics leteraris displeâts cun snait tal biel libri Giulietta e Romeo. L’origine friulana del mito di Albin Comelli e Francescje Tesei, sul finî dal Cinccent e ven cjapade sù di Shakespeare, il grant artist inglês che le consegne par simpri a sigure nomee. L’amôr di Juliete e Romeu al devente proverbiâl: cui no si isal mai lambicât par amôr? Cui no si isal prin o dopo fermât a pensâ parsore su cetant intrigât che al è chest sintiment? A proposit, ce fasêso ancjemò li cui voi sierâts? Sù mo sveaitsi, che tra pôcs dîs al è Sant Valantin! Augurons a ducj chei che si vuelin bon…