Tal mês di Jugn il Friûl al à ospitât la Bikerfest, un dai events plui impuartants pal popul dai motârs che a rivin di dute Europe ma ancje di chei altris continents. Pe ocasion la riviste in lenghe furlane “La Patrie dal Friûl” (www.lapatriedalfriul.org)
à volût dedicâ l’ultin numar propit ai motôrs in gjenerâl, un mont che al viôt i furlans come protagoniscj in diviersis dissiplinis.<
Il numar di Jugn si vierç cun Edi Orioli, l’innomenât campion dal desert, trionfadôr in tantis edizions de Parîs-Dakar e no dome, intervistât di Valentina Pagani.
Un altri ospit di chest mês al è Moreno Persello, fondadôr dal motoclub “Motârs” e diretôr de riviste Bikerslife.
Ma tal numar no si fevele dome di motos e machinis sportivis: e tache une inchieste a puntadis su lis aziendis che a decidin di doprâ il furlan par promovisi, po dopo si cjate ancje tante atualitât e in particolâr tante musiche cuntune lungje interviste a
Mauro Tubetti, DJ Tubet, rapper furlan-gjamaican che al regale une esclusive internet a La Patrie dal Friûl: un rap inedit che si pues scoltâ dome sul sît www.lapatriedalfriul.org.
E simpri par restâ su lis novitâts web, une altre esclusive interviste ai autôrs dal fenomen dal moment sul Facebook furlan: i creatôrs di “Tô Agne”.
Cun di plui si vise che dai 15 di Jugn, sul sît www.lapatriedalfriul.org a son disponibii i contignûts dal numar di Mai dedicât al volontariât. La Patrie dal Friûl si pues vêle par abonament o lant a comprâle tes miôr ediculis e librariis.