Cor Lila scjampe, anin vie di chi che se a ti cjapin tu sas ce ca ti fasin; e no sta vaì, no sta vaì: ormai as peraulates tu vores di iessi usade, ma las peraules no ti ferisin fisicamentri; se inveze a nus cjapin alore si ca nus fasin mal. Cor cor, come se la cjere nus brusas sot i pis, cor come ca scugnin cori chei a è une vite ca scjampin e ca corin encjemò plui fuart par podei restà in tune nazion ca no è la lor, ma ca è l’uniche ca ur pos da une vite da vivi.
Ma no sta a preoccupati Lila: cumò cuant chi rivin ta noste barache i clami Majid, Farid e Nordine e cun lor i tornarai idaur e alore si che je fasarin viodi, specialmenti a chel bastart di Talian ca l’è un emigrat come nou, ma parcè ca l’è leat cu la mafie di Marsiglia a si permet di metiti las mas d’intor e di mancjati di rispiet. Cor Lila cor, che a fuarce di cori prime o dopo alc a cambiarà vessio di cori par une vite interie; par sinti las vosaries di chei maledez ca nus vulin cjapà, ca si slontanin simpri di pui fin chè no las sintin ati.
E lui al continue a cori encje se las vous che cumò lu compagnin no son tristes, ma anzi a samè ca vulin dai coragjo e fuarce e a vosin di felicitat cuanche al fas alc di biel. Finchè in tune biele sere di LUi dal 2006, ches vous a tasin di colp e dut il mont a l’è li a domandasi parcè; parcè mai chel giuador italian a l’è li parcjere…..?
Cor Lila cor.