Doman a disposizion di ducj li dal Festival della Sicurezza di Udin il gnognolibrut pe prevenzion dai incidents in cjase. Un librut a fumuts cuintri dai incidents domestics indreçât ai fruts, ma ancje a i plui grancj, cun protagoniscj i Gnognosaurs. «No stâ a fâ il gnogno», chest il titul, midiant dai fumuts al invide ducj a fâ atenzion in cjase, un lûc che al samee il plui sigûr, ma li che si an trê voltis tant vitimis rispiet ai muarts tes disgraziis che a sucedin sul puest di vore. Produsût su iniziative de Ass5 de Basse Furlane la idee e il contignût tecnic a son par cure di Silla Stel cu la colaborazion di Antonella Arena, mintri che Graziana Ciani e à metût in rime une naine li che si contin i pericui che si à di stâ atents e che al è il fîl condutôr de publicazion. Doman sabide ai 15, tal ambit dal Festival della Sicurezza a Udin, si podarà cjatâlu a disposizion di ducj li dal stand de Ass5 de Basse Furlane (i stand a son sot de Loggia del Lionello e in vie Cavour) des 10 di buinore fin a lis 16.