Ai tre di avrîl al po’ capitâ di viodi esponude atôr pal Friûl une straneôse bandiere colôr turchìn cun, tal mieç, une grande acuile zâle cul bec e lis çatis rossis. No je une acuile tant che chês âtris, come par esempli, chê cun doi cjâfs dal defont imperi asburgic. Nol è il rapinôs rapaç dal marc di tantis citâts e regjons da l’Europe disore. Al è un dissen dal dut origjnâl, sclet, dibot geometric, essenziâl, stilizât.
Al è il steme dal antîc Patriarcjât di Acuilee che, propite ai 3 di avrîl dal 1077, al viôt ricognossût dal sacri roman imperadôr germanic, secont la ritualitât feudâl, la propie esistence di principât civîl rezût di un glesiastic.
Siben che a son passâts dibot mîl agns di chel acjadiment and’è inmò cualchidun che lu ricuarde, parvie che lu considere, a tuart o a reson, l’at dal ricognossiment, a traviers l’inviestidure imperiâl, de sovranitât teritoriâl e une identitât culturâl dal Stât furlan. L’acuile zâle in cjamp turchin metude fûr ai tre di avrîl, e je, aduncje, un mût palês di celebrâ l’ereditât di une instituzion che, insin des sôs originis, e vè vicendis tormentadis e, no di râr, vinturôsis.Il Patriarcjât nol è, parâtri, nome nostalgie: al è storie e mît insiemit.
Sun chest cont la storie e pant che daspò la vitorie sui Avars (791-799), Carli il Grant al veve slargjade la sô siorie des Alps Orientâls a la Donau, par miei organizâ chestis sôs possessions, prime al instituì la Marcje Avariche (o Orientâl), po la Marcje Austrâl a tramontane dal flum Drau e la Marcje dal Friûl a misdì dal istès flum. I siei sucessôrs, butât jù il duche Boldric tal 828, a dividèrin la Marcje dal Friûl in cuatri conteis.Lis devastazions ongjaris a scomençàrin tal 889, e a fasèrin grancj damps tes nestris tieris, oltri a disfantâ ogni forme di organizazion pulitiche-ministrative. L’imperadôr Oton I, daspò vê vinçût i ongjars te batae di Lechfeld (disòt Auguste) tal 955, al ricostruì lis marcjis Orientâl e Carantane, ma zà tal 952 al veve sometût la Marcje di Verone, il Friûl e l’Istrie al ducât di Bavarie, fasinti un ducât de sô corone.
Dilunc chescj acjadiments, il Patriarcjât di Acuilee al veve cuistât simpri plui impuartance e podê, tant che al timp dal patriarcje Rodoalt (963/984), il stes Pape al ricognossè Acuilee come prime sede di cà des monts daspò Rome. I moments plui impuartants che a zovàrin a fâ dal Friûl un "Stât libar e sovran" graciis al Patriarcjât di Acuilee, al di là des sengulis concessions o donazions, a fòrin chescj: la concesion al patriarcje Zuan, tal 971, des tieris di là dal Tajament, de siorie su la Badie di Sest e sul Vescovât di Concuardie e di dut il teritori logât disot de strade clamade Ongjarescje; la dispense dai obligs di fodre tes tieris patriarcjâls tai rivuarts dal duche Alberon di Carintie concedude tal 1027 e, in fin, la donazion dal dirìt di cjace concedût al patriarcje Popo dal imperadôr Conrât, tal 1028. Al fo, aduncje, un at dabon dovût il diplome che l’imperadôr Indrì IV (che al divignive de vicende di Cjanosse) al concedè al patriarcje Sigjeart tal 1077, a Pavie ai 3 di avrîl. Cun chest at il Friûl e chês âtris tieris leadis al Patriarcjât di Acuilee (come il Cjadovri, part da l’Istrie e v.i.) a vignivin dal dut distacadis dal ducât, trasferìnt a la sede acuilejês ogni dirìt e privileç regâl e ducâl.
Vadè che juridicamentri al è l’at di nassince de Patrie dal Friûl che, sot il guviêr dai patriarcjis e dal Parlament, e durà fintremai al 1420, cuanche plui par colpe dai contrascj e dai cavii, oltri che pe viltât de nobiltât furlane, che pe fuarce dai nimîs, e colà sot il domini de Republiche di Vignesie.