A vierzi cheste "Patrie" a saran un siôr editoriâl de professore Silvana Schiavi Fachin, neopresident dal Cfl2000, e une interviste al assessôr regjonâl Roberto Molinaro. Tra i tancj aprofondiments in mert, si segnale ancje une analisi dai ultins dîs agns in materie di insegnament de lenghe furlane a scuele (che dai dâts uficiâi dal ufici scolastic regjonâl, e je stade domandade dal 64% des fameis de provincie di Udin).
Il numar fresc di stampe al sarà presentât domenie ai 12 di Lui a lis 11.30 a Sant Lurinç di Sedean (aree des fiestis) vie pe anuâl fraie dal Istitût ladin furlan "Pre Checo Placerean". L’event al sarà viert dal salût di benvignût dal President dal Istitût William Cisilino e al continuarà cui intervents dal President de Provincie di Udin on.
Pieri Fontanini, dal assessôr regjonâl Claudio Violino, dal President de Agjenzie pe Lenghe Furlane Lorenzo Zanon e dal vicediretôr de Patrie dal Friûl Christian Romanini che al presentarà il numar di Lui.
Cun di plui si vise che dai 15 di Lui, sul sît www.lapatriedalfriul.org a saran disponibili i contignûts dal numar di Jugn dedicât ai Motôrs. La Patrie dal Friûl si ricêf par abonament o comprante tes miôr ediculis e librariis.
La Patrie dal Friûl (www.lapatriedalfriul.org) e dediche il speciâl dal numar di Lui "culture in fûc?" a lis vicendis resintis relativis a la tutele des lenghis minoritariis, dope de sentence de cort costituzionâl n.159/2009 su la L.R. 29/2007 "Normis in cont di tutele, valorizazion e promozion de lenghe furlane’’, lis polemichis sul Grant Dizionari Bilengâl Talian Furlan–br–, i tais continuis dal guvier roman ai fonts de leç 482/99: te interviste concedude al nestri mensîl, l’indipendentist sart Paolo Maninchedda al dîs che «il pronunciament de cort costituzionâl al è simbul di une Italie fraide che aromai e cîr di disvuedâ di contignût la stesse Cjarte Costituzionâl de Republiche».