Feminis economichis … migo masse :-)

di Monica Tallone

Spes si sint a dî che daûr di un grant om, un om di sucès, e je une grande femine. In tâl sens, tal Friûl di îr e di vuê a ‘nd è dal sigûr plui di cualchi esempli. Parimentri, dute la nestre storie e testemonee cemût che, tes etis di criure economiche, i oms no varessin podût lâ a cirî fortune in altrò cence che lis feminis, infratant, a sigurassin in patrie il drandran di cjase. In sumis, il compit e il pês de femine inte famee e inte societât, se ben platâts e cidins, ancje culì in Friûl – come dapardut là che par secui al à soflât il vint contrari de emigrazion – a son simpri stâts impuartantons e decisîfs. In Cjargne, za sul principi dal Sietcent, ven a stâi al timp de emigrazion stagjonâl dai Cramârs, si procurave che lis frutis a ricevessin il stes grât di scolarizazion dai fruts. Si saveve, di fat, che, une volte cressudis, cui oms lontans di cjase par tancj mês intun an, a varessin vût lôr di rezi la famee e la cjase, di viodi dai fruts e dai vecjos, des bestiis e de tiere; in altris peraulis, di cjapâ su lis lôr spalis la cjame de aziende domestiche.<br />
Si pues ben dî che, par agnorums, a son stadis pardabon lis feminis il cûr de societât furlane. Cun chel stes spirt di responsabilitât e sacrifici che i faseve – e i fâs – tignî sù i trê, ancje cuatri cjantons de cjase, la femine furlane dal dì di vuê e à savût, in cualchi câs, tirâsi in bande par permeti la afermazion professionâl, personâl e sociâl dal om; in altris câs, cuistâsi jê un puest di spic e di rispiet inte societât, fasintsi strade tal mont dal lavôr. Une strade mai facile, mai di rive jù, stant che la vite di une femine impegnade e je prin di dut e soredut un grum dificile. Epûr, il Friûl, vuê come vuê, al pues fâ stât su realtâts economichis une vore significativis, tant che la Nonino, la Danieli, la Tessitura carnica – dome par puartâ cualchi esempli – indulà che a àn o ben a àn vût une part di fonde lis feminis; e la impression e je, tra l’altri, che la presince e lis competencis femininis tal mont dal lavôr furlan a sedin ancjemò di tamesâ fin da pît. Il vot di març, la zornade dal an che il lunari al risierve par chê altre metât dal cîl, si fâs dongje. Come aromai e vûl la tradizion, in chel e intai dîs li ator, si ingrumin lis celebrazions. Udin, tra i tancj omaçs indreçâts al univiers feminin, a ’nt à parecjât un pardabon speciâl, une Fiere colôr di rose, che si è sierade domenie: la prime in regjon, in Italie e salacor tal mont dedicade fûr par fûr aes feminis. Dutis iniziativis, cheste in particolâr, che, viodude la part grandone ma pôc in mostre simpri vude des feminis te civiltât furlane, no son fregul fûr di lûc.