Si davuelzarà ai 14 di Dicembar li dal Visionario di Udin une serade speciâl pe premiazion dai vincidôrs de otave edizion dal Concors par Tescj Cinematografics in Lenghe Furlane. La serade e tacarà, aes 8 di sere, cu la proiezion dal film Cjavelârs / Pelissiers di Fredo Valla e Nereo Zeper. Si trate di un documentari par furlan e par ocitan che al ricuarde la storie dai “cjavelârs” che partint di Elva tes valadis ocitanis dal Piemont a rivavin fintremai in Friûl par comprâ i cjavei des feminis che a vignivin daspò vendûts in dut il mont par fânt piruchis <
Al vignarà daûr un altri documentari vignût fûr di resint: Federico Tavan: segni particolari, nessuno di Augusta Eniti e Paolo Comuzzi. Un lavôr che al piture il poete di Andreis come che nol è mai stât fat fin a vuê e li che dongje de vôs e de presince dal protagonist a vegnin pandudis lis testemoneancis di chei che lu àn frecuentât, sostignût e preseât, tra chei altris: Paolo Medeossi, Pierluigi Cappello, Aldo Colonnello, Paolo Cantarutti, il fotograf Danilo De Marco o Rosanna Paroni Bertoja.
Un curtmetraç, tirât fûr di I lûcs de poesie, al ricuardarà un altri poete de nestre tiere, Pierluigi Cappello e che chest an al è stât protagonist de sene leterarie. Cun di fat, dopo di vê vinçût intai agns passâts premis il premi Montale Europa, il Bagutta Opera Prima, cun “Mandate a dire all’imperatore” tal 2010 al vinç il prestigjôs premi Viareggio-Repaci.
Par finî al vignarà proponût al public Perché di Enrico Mengotti. Si trate di un film di finzion di 22 minûts zirât in Super8 a Glemone tal 1977. Enrico Mengotti al è un filmmaker di Vignesie che al à volût rapresentâ il dramatic event dal taramot dal 1976 traviers de storie di doi zovins a pene maridâts.
E sarà cheste une ocasion par presentâ il secont volum di une golaine publicade dal CEC e dedicade al nestri cine. Si trate di une opare di Sara De Simon e intitulade “Il cine furlan in lenghe furlane”. Il libri al è publicât in forme trilengâl (furlan / talian /inglês) ancje par fâ cognossi la aventure dal nestri cine in chescj, aromai, 30 agns, ancje fûr dai confins furlans.
Prime de consegne dai premis dal Concors a vignaran dâts fûr i premis “Mario Quargnolo” dedicâts ogni doi agns a personalitâts che a àn dât un contribût fondamentâl al cine furlan. Chest àn la jurie e à individuât trê professioniscj dal setôr: Marcello De Stefano, Lauro Pttini e Bruno Beltramini.
Chestis lis motivazions: A Marcello De Stefano “par jessi stât il precursôr, sedi sul plan teoric che sul plan regjistic, di un cine furlan in lenghe furlane”; a Lauro Pittini “che cul so cine, za a tacâ dai agns Otante, al à screât une gnove e dinamiche gjenerazion di cineascj furlans” e a Bruno Beltramini “pal so contribût al cine furlan, no dome tecnic sul plan de fotografie, ma cumò ancje a nivel regjistic”.
Dopo di chestis consegnis a vignaran premiâts i vincidôrs dal Concors par Tescj Cinematografics stabilîts di une jurie formade di Mario Turello, Roberto Iacovissi e Massimo Garlatti-Costa.
Il test de senegjature che e à cjapât il prin premi si cjatarà publicade sul numar 9 de riviste di cine “Segnâi di lûs” publicade e presentade propit in cheste ocasion.
La manifestazion, organizade dal CEC di Udin e je finanziade de ARLeF (Agjenzie Regjonâl pe Lenghe Furlane), de Provincie di Udin e dal Comun di Udin.
La jentrade e sarà libare.