Il cine furlan in lenghe furlanedi Sara De Simon, publicât e presentât in ocasion de 8e edizion dal Concors par Tescj Cinematografics, al è il secont volum di une golaine di libris par furlan dedicade al audiovisîf editade dal CEC – Centro Espressioni Cinematografiche (serie “Segnâi di lûs”). Sara De Simon e fâs une panoramiche complete dal nestri cine a tacâ soredut dai agns ‘80 fin al dì di vuê, lant a intervistâ i protagoniscj di cheste aventure. Cun di fat e pues jessi clamade aventure chê di un cine che al è nassût e che al à svilupât ideis e professionalitâts cence vê daûr di se societâts di produzion, televisions e istituzions dal setôr tant che pont di riferiment.
Nassude a Glemone tal 1982, Sara De Simon si è laureade li de Universitât di Udin / Universitât dal Friûl in Lenghis e Leteradure Forestis cul massim dai vôts e propit cun cheste tesi di lauree sul cine furlan.
Risultât di une ricercje une vore aprofondide par mieç di intervistis a regjiscj, professiniscj e operadôrs de Setime Art e par mieç di un scandai sui gjornâi e su lis rivistis culturâls che a àn publicât recensions e critichis su lis oparis cinematografichis, il libri al rive, salacor pe prime volte, a fâ une analisi complessive de storie dal cine in lenghe furlane.
Tra chei altris argoments tratâts o podìn segnalâ chel dedicât ai gjenars, un cjapitul intitulât “lis feminis e il cine” e un che al cjape in esam la dopleadure.
Il libri al è ancje insiorât cuntune serie di fotografiis che a ilustrin il lavôr dai protagoniscj che di plui a àn fat la storie dal nestri cine fin a vuê.
Il libri al è scrit in forme trilengâl (furlan / talian e inglês) cussì di deventâ un imprest par fâ cognossi ancje fûr dal Friûl la storie de nestre produzion audiovisive.
Chest volum di 159 pagjinis si pues cumò cjatâlu li dal Visionario o li de sede dal CEC.
Centro Espressioni Cinematografiche
v. Villalta, 24
33100 Udin UD